கிறிஸ் கெயிலின் அதிரடி ஆட்டத்தால் பரபரப்பாக நடைபெற்ற போட்டி! சூப்பர் ஓவருக்கே சூப்பர் ஓவர்

Author
Nivetha- inSports
Report
0Shares

கிங்ஸ் லெவன் பஞ்சாப், மும்பை இந்தியன்ஸ் அணிகளுக்கு இடையேயான போட்டியில் பஞ்சாப் அணி வெற்றி பெற்றுள்ளது

ஐபிஎல் 13ஆவது சீசன் 36ஆவது லீக் போட்டியில் கிங்ஸ் லெவன் பஞ்சாப், மும்பை இந்தியன்ஸ் அணிகள் தலா 176 ரன்கள் எடுத்ததால் ஆட்டம் சூப்பர் ஓவர் வரை சென்றது. சூப்பர் ஓவரிலும் இரு அணிகள் தலா 5 ரன்கள் சேர்த்ததால், மற்றுமொரு சூப்பர் ஓவரை நோக்கி போட்டி நகர்ந்தது. அதில், மும்பை இந்தியன்ஸ் 11 ரன்கள் எடுத்த நிலையில், பஞ்சாப் அணி 4 பந்துகளில் இலக்கை அடைந்து வெற்றிபெற்றது.

பஞ்சாப் அணி வீரர்கள் அடுத்தடுத்து ஆட்டமிழந்து பெவிலியன் திரும்பிய நிலையில், கேப்டன் கே.எல். ராகுல் தன்னுடைய பொறுப்பை உணர்ந்து சிறப்பாக விளையாடி 51 பந்துகளில் 3 சிக்ஸர், 7 பவுண்டரிகள் விளாசி 77 ரன்கள் குவித்தார். வெற்றிபெற கடைசி 6 பந்துகளுக்கு 9 ரன்கள் தேவைப்பட்ட நிலையில், கிறிஸ் ஜோர்டன் மற்றும் தீபக் ஹுடா இணைந்து 8 ரன்கள் மட்டும் எடுத்தனர். இதனால், போட்டி சூப்பர் ஓவர் வரை சென்றது.

துபாயில் டாஸ் வென்ற மும்பை இந்தியன்ஸ் பேட்டிங் செய்ய முடிவு செய்தது. ரோஹித் ஷர்மா 9 ரன்கள் எடுத்து பெவிலியன் திரும்பி அதிர்ச்சியளித்தார். அடுத்துக் களமிறங்கிய சூர்யகுமார் யாதவ் ரன்கள் எதுவும் எடுக்காமலும், இஷான் கிஷன் 7 ரன்கள் மட்டும் சேர்த்து நடையைக் கட்டினர்.

இருப்பினும் மறுமுனையில் சிறப்பாக விளையாடிய குவின்டன் டி காக் 43 பந்துகளில் 53 ரன்கள் சேர்த்து அதிரடி காட்டினார். க்ருனால் பாண்டியா தனது பங்கிற்கு 34 ரன்கள் எடுத்தார். இறுதியில், கெய்ரன் பொல்லார்டு அதிரடியாக விளையாடி 12 பந்துகளில் 34 ரன்களும், நாதன் கோல்டர் நீல் 24 ரன்களும் சேர்த்தனர். இதனால், மும்பை இந்தியன்ஸ் அணி 20 ஓவர்கள் முடிவில் 6 விக்கெட்களை இழந்து 176 ரன்கள் குவித்தது. முகமது ஷமி, அர்ஷ்தீப் சிங் ஆகியோர் தலா இரண்டு விக்கெட்களை கைப்பற்றினர்.

177 ரன்கள் எடுத்தால் வெற்றி என்ற நிலையில் களமிறங்கிய பஞ்சாப் அணி விக்கெட்களை அடுத்தடுத்து இழந்து தடுமாறியது. மயங்க் அகர்வால் (11), கிறிஸ் கெயில் (24), நிகோலஸ் பூரன் (24) ஆகியோர் சொற்ப ரன்கள் மட்டுமே சேர்த்தனர். தொடர்ந்து சொதப்பி வரும் கிலென் மேக்ஸ்வெல் இப்போட்டியிலும் மோசமாக சொதப்பி, ரன்கள் எதுவும் எடுக்காமல் வெளியேறினார்.

மறுமுனையில், துவக்க வீரர் கே.எல்.ராகுல் தனியொருவனாகப் போராடி ரன்குவிப்பில் ஈடுபட்டு 51 பந்துகளில் 3 சிக்ஸர், 7 பவுண்டரிகள் விளாசி 77 ரன்கள் சேர்த்து ஆட்டமிழந்தார். கடைசியில், பஞ்சாப் அணி வெற்றிபெற 12 பந்துகளுக்கு 22 ரன்கள் தேவைப்பட்டது. தீபக் ஹுடா (22), கிறிஸ் ஜோர்டன் (15) ஆகியோர் சிறப்பாக விளையாடி 21 ரன்கள் மட்டுமே சேர்த்தனர். இதனால், கிங்ஸ் லெவன் பஞ்சாப் அணி 20 ஓவர்கள் முடிவில் 6 விக்கெட்களை இழந்து 176 ரன்கள் சேர்த்து, போட்டியை சூப்பர் ஓவர் வரை நகர்த்தியது.

முதல் சூப்பர் ஓவர் டிரா ஆன நிலையில், அடுத்த சூப்பர் ஓவரில் கிறிஸ் கெயில் அதிரடியால் பஞ்சாப் அணி அபார வெற்றிபெற்றது. ஜஸ்பரீத் பும்ரா 4 ஓவர்கள் வீசி 3 விக்கெட்களை கைப்பற்றி அசத்தினார்.